राष्ट्रिय लोक तथा दोहोरी गीत प्रतिष्ठान नेपाल, पश्चिम उत्तर क्षेत्र भारत शाखा चण्डीगढको चौथो कार्यसमिति बैठक सम्पन्न, महत्वपूर्ण निर्णयहरू पारित

Khus Television News

हरितालिका तीज विशेष सांस्कृतिक कार्यक्रम आयोजना गर्ने निर्णय, भारतव्यापी कलाकार दर्ता अभियान सञ्चालन हुने

चण्डीगढ | ५ जुलाई २०२६ | Khus Television News

राष्ट्रिय लोक तथा दोहोरी गीत प्रतिष्ठान नेपाल, पश्चिम उत्तर क्षेत्र भारत शाखा, चण्डीगढको चौथो कार्यसमिति बैठक ५ जुलाई २०२६ का दिन देशसेवक भवन, सेक्टर–२९, चण्डीगढमा शाखा अध्यक्ष श्री अमर ओलीको अध्यक्षता तथा शाखा सचिव श्री लालवीर केसीको सञ्चालनमा सम्पन्न भएको छ।

बैठकमा संरक्षक तथा निवर्तमान अध्यक्ष श्री ललित गिरी, अध्यक्ष श्री अमर ओली, प्रथम उपाध्यक्ष श्रीमती सुमित्रा भुजेल, उपाध्यक्ष श्री गोपाल दर्लामी, महिला उपाध्यक्ष श्रीमती सीता शर्मा, सचिव श्री लालवीर केसी, कोषाध्यक्ष श्री शोभाराम ओली, सदस्य श्री प्रेम जी.एम., श्री जगत खड्का, श्री ऋषिराम अमगाई, श्री देव गौतम, श्री रेशम राणा, सुश्री रचना थापा तथा सुश्री प्रीति केसी लगायतको उपस्थिति रहेको थियो।

बैठकको प्रारम्भमा शाखाका सदस्य श्री टोपलाल चौहानका पूजनीय पिताको दुःखद निधनप्रति गहिरो शोक व्यक्त गर्दै दिवंगत आत्माको चिरशान्तिको कामना तथा शोकाकुल परिवारप्रति हार्दिक समवेदना प्रस्ताव सर्वसम्मतिले पारित गरिएको थियो।

बैठकले शाखा सचिवद्वारा प्रस्तुत सांस्कृतिक कार्य तथा बचत समूहसम्बन्धी परिमार्जित नियमावली सर्वसम्मतिले स्वीकृत गरेको छ। साथै आर्थिक वर्ष २०८३/०८४ का लागि प्रस्तावित आठबुँदे कार्ययोजना पनि सर्वसम्मतिले पारित गरिएको छ। नियमावली र कार्ययोजना सम्बन्धित समूहमा PDF सहित उपलब्ध गराइने जानकारी दिइएको छ।

बैठकले भारतभर रहेका नेपाली लोक तथा दोहोरी कलाकारहरूको तथ्यांक संकलन गर्ने उद्देश्यले भारतव्यापी कलाकार दर्ता अभियान सञ्चालन गर्ने निर्णय गरेको छ। कलाकारहरूको अवस्था, हकहित, क्षमता अभिवृद्धि तथा भावी कार्यक्रमलाई प्रभावकारी बनाउन यो अभियान सञ्चालन गरिनेछ। सम्पूर्ण कलाकारलाई उपलब्ध गराइने अनलाइन फाराममार्फत आफ्नो विवरण भरेर अभियानमा सहभागी हुन आग्रह गरिएको छ।

यसैगरी शाखा कार्यालयमा केन्द्रीय अग्रज कलाकारहरूसँगै यस शाखाका हालसम्मका सम्पूर्ण अध्यक्षहरूको फोटो सम्मानपूर्वक अनिवार्य रूपमा राख्ने निर्णय पनि गरिएको छ।

बैठकले आगामी ६ सेप्टेम्बर २०२६ मा हरितालिका तीज विशेष सांस्कृतिक कार्यक्रम आयोजना गर्ने निर्णय गरेको छ। कार्यक्रममा भारतमा रहेका कलाकारहरूलाई प्राथमिकता दिइनेछ। कार्यक्रमको अनुमानित खर्च रु. ५० हजारदेखि ६० हजार रहने प्रारम्भिक अनुमान गरिएको छ।

कार्यक्रम सफल बनाउन संरक्षक तथा अग्रज कलाकार श्री लक्ष्मण न्यौपाने, श्री बाबुराम परियार, संरक्षक तथा निवर्तमान अध्यक्ष श्री ललित गिरी, अध्यक्ष श्री अमर ओली तथा सल्लाहकारहरू श्री हरि खरेल, श्री गोपाल शर्मा र श्री अमृत पौडेलले विशेष आर्थिक सहयोग गर्ने प्रतिबद्धता व्यक्त गर्नुभएको बैठकले जनाएको छ।

साथै कार्यक्रम सञ्चालनका लागि कार्यसमितिका २५ जना पदाधिकारी तथा सदस्यबाट अनिवार्य रु. १,००० र साधारण सदस्यबाट रु. ५०० सहयोग संकलन गर्ने निर्णय गरिएको छ। उक्त रकम संकलन गर्ने जिम्मेवारी शाखाका कोषाध्यक्ष श्री शोभाराम ओली तथा सह-कोषाध्यक्ष श्री गङ्गा बेलबासेलाई प्रदान गरिएको छ।

हल बुकिङ तथा साउन्ड सिस्टम व्यवस्थापनको जिम्मेवारी शाखा अध्यक्ष श्री अमर ओलीलाई तथा पोस्टर, ब्यानर, मोमेन्टो, खादा र ब्याज व्यवस्थापनको जिम्मेवारी शाखा सचिव श्री लालवीर केसीलाई प्रदान गरिएको बैठकले जनाएको छ। अन्य आवश्यक विषयहरू समयानुकूल छलफल गरी सम्बन्धित पदाधिकारीलाई जिम्मेवारी प्रदान गरिने पनि निर्णय भएको छ।

बैठकको समापन गर्दै अध्यक्ष श्री अमर ओलीले संस्थालाई अझ व्यवस्थित, मर्यादित र सशक्त बनाउन सम्पूर्ण पदाधिकारी, सदस्य तथा शुभेच्छुकहरूको निरन्तर सहयोग आवश्यक रहेको उल्लेख गर्दै उपस्थित सबैलाई धन्यवाद व्यक्त गर्नुभयो।

Khus Television News ले राष्ट्रिय लोक तथा दोहोरी गीत प्रतिष्ठान नेपाल, पश्चिम उत्तर क्षेत्र भारत शाखा, चण्डीगढले सांस्कृतिक संरक्षण, कलाकारहरूको हकहित र संस्थागत सुदृढीकरणका लागि गरेका यी निर्णयहरूलाई सकारात्मक कदमका रूपमा लिएको जनाएको छ।

– Khus Television News